كيفية اجتياز المقابلة الشخصية مع منظمات المجتمع المدني او الفرق التطوعية بنجاح

مرحبا شباب ....

.المقابلات الشخصية ، من اكثر الاشياء الي توتر و تحتاج تكون هادي و متحضر قبل لا تروح .

من وجهة نظري و التجارب البسيطة اللي مريت بيها عرفت ان هذا التوتر و الرهبة من المقابلة هو الشي اللي ممكن يخلينا ما ننقبل بالوظيفة او المنحة او اي شي يحتاج مقابلة ،

على الاغلب التوتر يجينا من شعورنا بقلة الثقة او شعورنا بوجود نقص معين او شي مجهول و خايفين لا يبين هذا الشي و نفشل ،

لذلك حتى نقلل من هذا التوتر و نزيد ثقتنا ، اكو بعض الخطوات اني شخصيا كنت اتبعها ممكن تساعدكم ،

مقابلة شخصية 

1- قبل المقابلة : نحاول قدر الامكان نجمع معلومات عن الجهة اللي دنقابل بيها و البوزشن اللي مقدمين عليه ،

ف نكدر نقرا عنهم من خلال موقعهم نعرف شنو مشاريعهم شنو شغلهم شنو نجاحاتهم بشنو همة متميزين شنو نوع التطابق بين مهاراتي و خبراتي و طبيعة شغلهم ، هذه كلها اشياء ممكن تساعدنا ان نفهم هذه الجهة و نكدر نجاوب في حال سألونا شتعرفون عننا او ليش تريدون تشتغلون يمنا .

بعدها نحاول نقرا اكثر عن طبيعه البوزشن اللي احنا مقدمين عليه نسأل ناس مشتغلين بهيج شغل شنو مهامهم شنو المطلوب منهم شنو المهارات المطلوبة لهذا البوزشن و نطابقها ويا مهاراتنا ،

في حال كانت المقابلة باللغة الانكليزية ف نحاول ما نخاف لان اللي ديقابلنا يعرف ان هي مو لغتنا الام و ماراح يدور ورانا قواعد لكن يريدنا نعرف نوصل فكرتنا بهذه اللغة (نفتهم ونفهم)

حتى نتغلب ع الخوف من اللغة نحاول نتدرب ع الاسئلة الاعتيادية الواردة و المكررة مثل "عرفنا عن نفسك" اذا كدرنا نتدرب على طريقة تعريفنا بنفسنا بالانكليزي بصورة زينة ف هذا راح ينطي انطباع جيد نوعا ما و يزيد ثقتنا بنفسنا حتى نكمل باقي المقابلة ،

2- قبل يوم المقابلة نام من وكت لا تسوس حركات الامتحان و تبقى سهران تحضر للمقابلة و تحفظ بالحجي الانكليزي والاسئلة المتوقعة و تروح مطفي ، لان هيج حتى اللي تعرفه راح تنساه،

3- في يوم المقابلة حاول تلبس لبس مرتب و نظيف ميحتاج تلبس توكسيدو ولا تروحلهم مبهذل .

و نخلي ببالنا دائما انه اذا انرفضنا بالمقابلة ف مو معناه احنا فشلة او هذه نهاية العالم ، بالعكس ننتبه ع اخطائنا ننتبه ع لغة الجسد شخبصنا كدامهم ننتبه ع لغتنا لان ممكن تحتاج تطوير اكثر ،

لحد ما يجي اليوم و تكون المقابلات زلاطة 

سولفولنة شنو الطرق الي تستخدموها حته تتحضرون للمقابلات ؟

نشوفكم في مشاركة أخرى 🖐